Украина ја победи Чешка, а колото во Групата 4 ќе се комплетира вечерва кога на Македонија и е потребна победа над Исланд.
Ракометната репрезентација на Украина по некомплетираното трето коло, во квалификациите за пласман на Европското првенство во Хрватска, ја презеде лидерската позиција во Групата 4 и во првиот меч од третата рунда ја победи Чешка со резултат од 26:23.
Украинците, во првото коло загубија во Скопје, потоа како домаќини го совладаа Исланд и ја искористија предноста на домашниот терен со што заслужено ја однесоа победата против Чешка предводени од Жуков и Козакевич.
Ракометната репрезентација на Македонија вечерва во спортската арена „Борис Трајковски“ ќе го пречека Исланд.
Македонија и Исланд последен пат играа во јануари годинава на Светското првенство во Франција каде натпреварот заврши со израмнет резултат од 27:27.
На клупата на македонската селекција на овој меч ќе дебитира Шпанецот Раул Гонзалес кој го наследи Лино Червар на фунцијата тренер. Гонзалес ги одреди играчите кои ќе му се спротивстават на Исланд со што од списокот на 19 играчи отпаднаа играчите Велковски, Поповски и голманот Томовски.
Македонија и Исланд по два натпревари имаат по победа и пораз.