Шведскиот напаѓач Златан Ибрахимовиќ по крајот од сезонава би можел да го напушти Милан и, како што пишуваат италијанските медиуми, би можел да ја продолжи кариерата во редовите на Монца.
Клубот каде што директор е Адриано Галиани, со кој Ибрахимовиќ со години се познава и со кој има навистина добар и коректен однос, наредната сезона речиси сигурно повторно ќе игра во калчо елитата. Таквиот развој на настаните ќе значи и дека клубот ќе треба да се засили, а еден од играчите кои Монца ги планира е токму шведскиот ветеран, со кој тимот би се засилил и би се обидел да се вмеша во борбата за местата што водат во фудбалска Европа.
Ибрахимовиќ неодамна со гол од пенал против Удинезе стана најстар стрелец во Серија А, гол кој го постигна во моментот кога имаше 41 година и 166 дена. Претходно рекордот го држеше Алесандро Костакурта кој во листата на стрелци се запиша со 41 година и 25 дена, во мај 2007 година, исто така од пенал.
Феноменалниот 41-годишен фудбалер воопшто не губи мотивација кога е во прашање овој спорт, а потсетуваме дека повторно стана и репрезентативец.
„Веројатно се прашувате што правам тука. Мислите дека сум глупав што сум тука, имам 41 година и играм за репрезентација. Но, почекајте да дојдете блиску до крајот. Тогаш ќе сфатите сѐ што сега правам и ќе почне да ве фаќа паника. Нема да сакате да престанете, по секоја цена ќе сакате да продолжите“, сликовито објасни Ибрахимовиќ зошто и натаму игра за Шведска.
Ибра со Милан има важечки договор до крајот на сезонава, а потсетуваме, клубот не го пријави за играње во Лигата на шампионите, што можеби е една од причините поради кои Златан размислува за промена на средината.