Познатата изрека дека „денот по утрото се познава“ е многу точна.
Откако ќе станете од кревет треба да бидете опуштени и фокусирани и да се подготвите за денот што ве очекува, а не да брзате и да се нервирате.
Вашите утрински рутини во голема мера го диктираат темпото и начинот на кој ќе ви се одвива остатокот од денот, па затоа научете се да станувате порано за да имате време да го искористите утрото и да си го испланирате денот.
Овие три утрински рутини ќе ви помогнат спокојно да го почнете денот и да бидете попродуктивни:
Испланирајте што ќе јадете
За да не посегнете по брза храна, нездрави грицки и благо, испланирајте што ќе јадете во трите оброци и ужинки во текот на денот. Исто така одредете го времето кога ќе ги јадете оброците, согласно вашите обврски тој ден. На овој начин ќе се храните поздраво и нема да трошите пари за храна во последен миг.
Направете нешто што ве прави среќни
Секое утро одвојте 20-30 минути за некое хоби што ви причинува задоволство. Дали тоа ќе биде вежбање, читање, сликање, пиење кафе или време поминато со партнерот или семејството, тие 20-тина минути ќе ве наполнат со позитивна енергија за целиот ден.
Направете распоред на обврски
Додека појадувате или пиете кафе, запишете ги сите работи што треба да ги направите тој ден, без разлика дали се мали или големи. Така полесно ќе имае увид што ви останува да направите, а вечерта ќе се чувствувате задоволни кога ќе ги видите штиклирани работите што сте ги запишале на листата. Тоа ќе ви даде чувство на исполнетост и елан за следниот ден.
