Вил Смит привлече огромно внимание во светот поради Оскарите, но не на начинот на кој посакуваше.
Актерот јавно му се извини на Рок и објасни зошто го удри. На Instagram тој објави соопштение во кое објаснува дека насилството во сите негови облици е отровно и деструктивно.
„Моето однесување на синоќешното доделување на Оскарите е неприфатливо и не може да се прости. Шегите на моја сметка се дел од мојата работа, но шегите за здравствената состојба на Џејда беа премногу за мене и реагирав емотивно“, напиша Смит.
Тој јавно му се извини на Крис Рок.
„Сакам јавно да ти се извинам, Крис, погрешив и не бев при себе. Засрамен сум и моите постапки не укажуваат на човекот каков што сакам да бидам. Нема место за насилство во свет на љубов и добрина. Се извинувам и на Академијата, на продуцентите на емисијата, на сите присутни и на сите кои гледаа ширум светот. Сакам да се извинам на семејството Вилијамс и на моето семејство во King Richard.
Длабоко жалам што моето однесување го засени тоа што инаку беше прекрасно патување за сите нас“, додаде Смит.
„Работам на себе“, заврши тој во обраќањето.