Египетските археолози направија големи откритија изминатиов периов, а сега известија за нови 52 гробници меѓу кои и на кралицата Неит од периодот на Старото Кралство.
Меѓу пронајдоците се издвојува храмот стар 4 илјади години во кој е пронајден саркофагот на кралицата Неит, една од водечките сопруги на фараонот Пепи II Неферкаре, припадник на шестата династија која владеела со Старото Кралство на Египет.
Министерството за туризам и археологија на Египет објави дека се ископани 52 гробници. Ископувањата биле предводени од водечкиот египтолог Захи Хауас.
„Дрвените саркофази кои потекнуваат од Новото Кралство на Египет се пронајдени во 52 гробници длабоки помеѓу 10 и 12 метри. На тоа место е пронајден и погребниот храм на кралицата Неит, сопруга на фараонот Пепи II, како и три магацини соѕидани со тули“, вели Хауас.
Ископувањата открија и гробници, сандаци со мумии, статуи, стели, играчки, дрвени бродови и погребни маски, како и петметарски папирус на кој е прикажано поглавјето 17 од Книгата на мртвите.
За кралицата Неит се смета дека е ќерка на фараонот Пепи I и кралицата Анхесенпепи I, што значи дека веројатно била полусестра на својот сопруг.
