Скопје в сабота ќе биде домаќин на фудбалски турнир за аматерски екипи на кој ќе учествуваат две екипи од Србија, една од Бугарија и македонскиот Слободен од Аеродром.
Гостинските екипи се всушност клубови оформени од странци кои живеат и работат во Белград и Софија и кои се претежно Британци, а во Обединетото Кралство биле играчи во клубови низ пониските лиги. По доаѓањето во Србија и Бугарија, бидејќи како странци немаат право да играат во тамошните пониски лиги, оддлучиле да создадат свои клубови и неформална лига од 6 екипи организирана со судии и со сите нишани. Во нивните клубови има и играчи Срби и Бугари. Во Скопје доаѓаат на пријателски турнир за дружење, забава и пресметка на зелениот терен.
Екипите учесници се ФК Југо 55 од Белград, ФК Победник од Белград, ФК Софија Ренџерс од бугарската престолнина, како и домаќинот ФК Слободен од скопски Аеродром, кој настапува во општинската лига на Кисела Вода.
Турнирот почнува од 12 часот со натпреварот Југо 55 - Софија Ренџерс, а ќе се игра по италијански систем - еден натпревар трае 45 минути, се игра секој против секого и тоа во еден ден. Турнирот ќе заврши со церемонијата на прогласување на најдобрите во 17 часот. Целиот настан ќе се одржи на стадионот „Железарница“ на второлигашот ФК Скопје во Автокоманда.
Распоред:
12:00 Југо 55 - Софија Ренџерс
12:50 Слободен - Победник
13:40 Југо 55 - Слободен
14:30 Победник - Софија Ренџерс
15:20 Југо 55 - Победник
16:10 Софија Ренџерс - Слободен
Влезот на стадионот „Железарница“ ќе биде бесплатен, а во оглед на тоа што во Скопје в сабота нема многу избор што фудбал да се гледа во живо, овој меѓународен турнир е одличен избор за фудбалските вљубеници. Од првата лига в сабота избор е само дуелот Шкупи - АП Брера Струмица од 15 часот на „Чаир“, додека од втората нема натпревар во Скопје.
