Парче вселенски отпад што беше премногу мал за да се следи ја погоди Меѓународната вселенска станица (МВС) и ја оштети нејзината роботска рака Canadarm2.
За среќа, инструментот е сè уште функционален, но предметот му ја проби термичката заштита и оштети некои од неговите компоненти.
Вселенските агенции и научната заедница веќе извесно време предупредуваат на проблемот со вселенскиот отпад (остатоци од мисии и сателити), наведувајќи дека станува збор за „темпирана бомба“. Експертите следат повеќе од 23.000 парчиња поголеми од тениско топче за да избегнат судир меѓу нив и МВС или сателит.
Помалите објекти е невозможно да се следат, но тоа не значи дека не можат да предизвикаат значителна штета на активните мисии во орбитата на Земјата, пишува Science Alert.
130 милиони мали фрагменти
Canadarm2 (SSRMS), дизајниран од Канадската вселенска агенција (CSA), е дел од МВС цели 20 години. Тоа е роботска титаниумска рака што служи за одржување на станицата и за помагање на маневрирање предмети надвор од МВС, како што се товарни бродови.
Засега е непознато кога точно се случила несреќата. Штетата за прв пат е забележана на 12 мај, за време на рутински преглед.
„И покрај влијанието, тековните анализи покажуваат дека уредот е сè уште функционален. Оштетувањето е ограничено на мал дел од раката и термичкиот капак. Canadarm2 продолжува со планираните операции“, напиша CSA.
Иако МВС имаше среќа овојпат, проблемот со вселенскиот отпад се зголемува од година во година и прашање на време е кога може да се случи посериозна штета. Меѓународната вселенска станица минатата година мораше трипати да изведе маневри за итни случаи за да избегне судири со вселенски остатоци.
Европската вселенска агенција (ЕСА) проценува дека околу 130 милиони фрагменти од човечки изработен материјал помали од еден милиметар во моментов кружат околу Земјата.