Огромната ледена покривка на Гренланд изгубила 4,7 милијарди тони мраз за 20 години, што предизвикало зголемување на нивото на океаните за 1,2 сантиметри, покажуваат новите податоци од данското истражување на Арктикот објавено оваа недела.
Тој волумен на стопен мраз, кој би ја покрил површината на САД со половина метар вода, е особено важен за бреговите на Гренланд, покажуваат истражувањата засновани на сателитско следење на програмата Grace.
„Од почетокот на мерењата во април 2002 година, ледената покривка на Гренланд изгуби околу 4.700 гигатони мраз или 4.700 просторни километри“, објави Polar Portal, чадор организација на данските институти за Арктикот.
„Тоа топење на мразот придонесе за подигнување на нивото на морето за 1,2 сантиметри“, додаде тој.
„Податоците покажуваат дека најголем дел од загубата на мразот се случува на рабовите на ледената покривка каде што мразот се повлекува, дека ледените фронтови се повлекуваат во фјордовите и на земјата и дека топењето е посилно на површината на мразот“, објасни тој.
Според овие податоци, особено е погоден западниот брег на Гренланд.
Глобалното затоплување е особено алармантно на Арктикот, каде што во последните децении се одвива три до четири пати побрзо отколку во остатокот од светот, покажуваат најновите научни истражувања.
Според студијата објавена од НАСА кон крајот на јануари, забрзаното топење на мразот во близина на брегот се должи на затоплувањето на Арктичкиот океан, што придонесува „барем како површинскиот воздух“ за намалување на ледената покривка.
Доволно мраз за океаните да се издигнат за 7 метри
Топењето на мразот на Гренланд моментално е главната причина за зголемувањето на нивото на океаните на Земјата. Глечерите на Гренланд се повлекуваат шест до седум пати побрзо отколку пред 25 години, според НАСА.
Според климатолозите, на Гренланд има толку многу мраз што доколку се стопи океаните би можеле да се издигнат за повеќе од седум метри.
Ледената покривка на Арктикот исто така драматично се повлече, губејќи речиси 13 отсто од својата површина за десет години.