Американската агенција за храна и лекови (FDA) издаде дозвола за итна употреба на вакцината против COVID-19 од американската фармацевтска компанија Pfizer и германската BioNTech.
Извори на Associated Press тврдат дека неколку часа пред да биде издадена дозволата, „висок државен службеник во Белата куќа му се заканил на шефот на FDA дека ќе биде отпуштен ако вакцината не добие дозвола до крајот на денот“.
CNN потсетува дека оваа вакцина покажала ефикасност од 95 отсто, дека првите вакцинации ќе започнат во наредните денови и дека терминот „за итна употреба“ значи дека може да се користи во итни ситуации, но дека сè уште нема целосен сертификат и целосно одобрување од властите, за што Pfizer ќе треба да достави посебно барање до FDA.
Пред почетокот на масовната вакцинација, Центрите за контрола и превенција на болести на САД (CDC) и Советодавниот одбор за превенција и имунизација на САД мора да дадат препорака по што CDC ја усвојува последната препорака и дава зелено светло за да започне вакцинацијата на населението.
Вакцинацијата се очекува да го смени текот на пандемијата во САД, каде досега починаа повеќе од 295.000 пациенти од коронавирусот.
„Ова е уште еден чекор во низата чекори што водат до крајот на оваа пандемија“, рече Амеж Адаља од одделот за здравствена безбедност на Универзитетот „Џонс Хопкинс“.
Покрај Велика Британија, која прва одобри употреба на вакцината на Pfizer, официјални лиценци за употреба на оваа вакцина се издадени во Мексико, Бахреин и Саудиска Арабија.