Жан Митрев исвиркан: Со фотографии од починатите и транспаренти пречекан пред судот

Со фотографии од починатите пациенти од Клиниката „Жан Митрев“ и транспаренти, на кои го обвинуваат за профитерство, семејствата на починатите го чекаа кардиохирургот утрово пред Кривичниот суд. Судењето и денес не почна. Судијката го одложи затоа што предметот е во Апелација по жалба од одбраната за замрзнувањето на сметките. Ново рочиште закажа за 12 мај. Сметките на Жан Митрев и на правното лице беа замрзнати пред првото закажано рочиште за да се обезбеди предјавеното имотно-правно побарување на оштетените.

И првото рочиште, кое требаше да се одржи на 28 февруари, беше одложено на барање на одбраната со објаснување дека им треба време да го доекипираат тимот. Добија рок до денес да ја подготват одбраната.

Семејствата на починатите носеа транспаренти, на кои стоеше: „Хемофилтрациите ги убија нашите најмили, бараме одговорност“, „Убиј стотина луѓе, собери 97,5 милиони и купи си слобода за еден милион“, „Нашите најмили починати за него беа само колатерална штета од 1 милион залог за слобода“, „Профитер на грбот на болните од Ковид-19“… Кога Жан Митрев се појави пред судот, тие скандираа „Правда, правда“ и го исвиркаа. Кардиохирургот Митрев воопшто не реагира на скандирањата и свиркања, ги одмина и си влезе во судот.

Набргу реакција стигна од маркетинг-службата на Клиничката болница „Жан Митрев“ со обвинување за организирана хајка против кардиохирургот.

„Организирање луѓе со транспарентни, кои повикуваат на линч, создаваат атмосфера како сè да е веќе решено, е најостро рушење на правдата и одземање на правото да се докажат невиноста и вистината. Ова не е правно оружје и на ваков начин се спречува вистината. Ако процесот против д-р Жан Митрев и Клиниката ‘Жан Митрев’ е непристрасен, фер и без влијание, тогаш каде е презумцијата на невиност и зошто се води организирана хајка“, стои во соопштението од Клиничката болница „Жан Митрев“.

Жан Митрев и неговата клиника се товарат за измама оти ги држеле во заблуда пациентите со прикривање факти во однос на лекувањето од Ковид-19 со хемофилтрации.

Истрагата за Жан Митрев и неговата болница беше отворена по допрен глас откога Истражувачката репортерска лабораторија (ИРЛ) го објави истражувањето „Нечиста крв“ за пациентите од болницата, а Скопското јавно обвинителство во јануари годинава поднесе обвинение.