Иако улогите на пионери во разни области често им биле оспорувани, има жени без кои сегашноста не би била иста. Една од нив е заслужна за постоењето на Mercedes-Benz.
Германскиот гигант во 2019 година во чест на 170-годишнината од раѓањето на Берта Бенц го претстави филмот „Берта Бенц: Патувањето кое смени сѐ“.
Филмот е посветен како инспирација за жените и мажите ширум светот храбро и полни со самодоверба да ги остваруваат своите визии, рече тогаш компанијата со седиште во Штутгарт.
„Берта беше пионер, нашиот прв тест возач. Нејзината храброст и упорност многу ме инспирираат. На мојот тим му беше важно да ја опишеме Берта Бенц како силна жена и безвременски пример. Нашиот тим сака да ги мотивира луѓето низ животот да одат на сличен позитивен, отворен пристап и да се соочуваат со предизвиците со самодоверба“, рече потпретседателката на одделението за маркетинг во Mercedes-Benz, Бертина Фецер.
Со цел да го сврти вниманието на јавноста кон изумот на нејзиниот сопруг Карл Бенц, Берта влезе во историјата пред 130 години со одлуката да тргне на првото големо патување со автомобил од речиси 100 километри, заедно со нејзините двајца малолетни синови.