Една од локациите каде што се снимаше филмот „House of Gucci“ е вилата Балбијано на езерото Комо, а од вчера е достапна за изнајмување на Airbnb.
Ноќевање на луксузниот имот чини нешто повеќе од 1000 евра, а фотографиите нудат увид во палатата од 17 век.
Во филмот „House of Gucci“, таткото на семејството, Алдо Гучи, живее во големата палата од 17 век со раскошни градини, барокни фрески и украсени позлатени ентериери. Интересно е што ова не е филмски сет, а некои гледачи уште од трејлерите го препознаа вистинскиот идентитет на имотот - вилата Балбијано - една од најпознатите на езерото Комо.
Од вчера, страницата за изнајмување Airbnb официјално го претстави големиот имот, иако само за краток период во март. Понудата сигурно ќе ги привлече модните фанатици, љубителите на историјата и уметноста.
Вилата Балбијано датира од 17 век и била најпознатиот дом на кардиналот Дурини во 18 век. Собрал голема колекција на уметнички дела и купил дополнителни парцели на кои потоа изградил дополнителни објекти, вклучително и црква. За време на неговото владеење, Вила Балбијано стана место за собирање на италијанските интелектуалци.
Денес, просторот на вилата е исполнет со мебел набавен од аукции во Sotheby’s и Christie’s. Фреските од 17 век на барокните сликари браќата Реки и Агостино Силва се извонредно добро сочувани.
Познатиот француски дизајнер на ентериер Жак Гарсија, исто така, помогна да се модернизираат шесте апартмани на вилата за да можат денешните посетители да уживаат во нив. Други луксузни детали вклучуваат кристални лустери, мермерни бањи и мебел тапациран со кадифе во боја на скапоцени камења.