Вечерашниот натпревар од Лигата на шампионите помеѓу Бенфика и Јувентус се игра без технологија на гол-линијата од бизарна причина.
Бенфика вечерва на стадионот „Да Луз“ од 21 часот го пречекува Јувентус, а главниот судија на натпреварот Срѓан Јовановиќ нема да ја има помошта од goal-line технологијата.
Goal-line технологијата е воведена пред ВАР, а тоа е систем кој автоматски проверува дали топката ја минала гол линијата и веднаш му испраќа сигнал на судијата дали голот е важечки.
Но, вечерва на српскиот судија ќе му биде ускратена таква помош од прилично бизарна причина.
На стадионот на Бенфика се вршат градежни работи и поради нив е недостапна goal-line технологијата. Бенфика не ја известила УЕФА навреме за овој проблем, а чадор-куќата на европскиот фудбал донесе одлука овој натпревар да се игра без оваа технологија.
„За жал, нема да може да се инсталираат потребните уреди за да функционира системот. Натпреварот ќе се одржи без него“, соопшти УЕФА.
