Студијата спроведена во Германија покажува дека керамичките работилници во близина на Шпајхер произведувале многу повисоки емисии на загадување помеѓу II и V век.
Покрај тоа што биле надарени градители, старите Римјани биле и надарени пронаоѓачи. Во прилог на овој факт говори и тоа што го измислиле првото подно греење, софистицираните капацитети за капење, но и, како што сугерира најновата студија, цели индустриски региони.
Една таква област неодамна беше откриена од Центарот за археологија Лајбниц предводен од археологот Холгер Шаф. Тие сега тврдат дека Римјаните основале околу 240 грнчарски работилници во регионот околу градот Шпајхер во Ајфел помеѓу II и V век од нашата ера, и дека заземале површина од околу 4 квадратни километри - вистински индустриски регион.
Поради тоа истражувачите со право се запрашале: дали тоа влијаело на квалитетот на воздухот во регионот?
Со цел да се утврди нивото на загаденост на воздухот во регионот околу античките работилници, студентите кои учествувале во проектот направиле симулација со помош на историски податоци за времето и теренот, како и емисиите од печките. На овој начин, тие можеле да ги разберат не само нивоата на емисии на загадувачи од фабриките за керамика, туку и дистрибуцијата на овие супстанции во воздухот.
Биле земени предвид и големината на тогашните печки за керамика и фактот што производството на керамика било помало отколку во денешните индустриски погони. Времето потребно за процесот на печење во тоа време било исто така точно одредено со користење на реплика на печки.
Резултатите покажуваат дека вредностите на загадувачите на воздухот како што се азот оксид и јаглерод моноксид биле многу високи во тоа време, дури и повисоки од денешните, главно поради недостатокот на филтри и системи за чистење на издувните гасови на шпоретите.
Мислењето на експертите е дека не може да се каже дали Римјаните во тоа време биле свесни дека испуштаат токсични издувни гасови во околината. Во најмала рака, откако грнчарската индустрија се преселила во Мајен, тие сигурно забележале дека воздухот е помалку правлив.