Именуван по познатиот слично замислен модел од 60-тите, атрактивниот Alfa Romeo 33 Stradale со себе носи две погонски опции...и веќе е распродаден.
Alfa Romeo 8C беше последниот суперспортски модел што познатата италијанска автомобилска компанија го произведе од 2007 до 2010 година (вкупно 500 примероци), а по долго затишје, миланезите претставија нов суперспортски двосед кој не е наследник на моделот 8C, бидејќи за инспириран на бројчано ограничениот двосед му послужи легендарниот модел 33 Stradale (базиран на тркачката верзија на Tipo 33), кој беше направен во само 18 примероци на крајот на 60-тите.
Преродениот модел 33 Stradale рачно ќе го склопуваат специјалисти на познатата италијанска компанија Carrozzeria Touring Superleggera, кои го составија и егзотичниот Giulia SWB Zagato, а добрата вест за богатите ентузијасти кои не успеаја да обезбедат еден од единствените 33 планирани примероци од оваа егзотика на Alfa е изјавата на првиот човек на миланската компанија кој рече дека 33 Stradale нема да биде последниот суперспортски модел на Alfa Romeo.
На премиерата беше откриено дека Alfa Romeo 33 Stradale ќе се нуди во комбинација со трилитарски битурбо V6 мотор кој не е „позајмен“ од Maserati MC20, бидејќи е еволуција на добро познатиот 2,9-литарски мотор од најмоќната Giulia GTA. Stradale развива повеќе од 620 коњски сили, кои се распоредени на задната оска со 8-брзинскиот автоматски менувач на ZF со две спојки. Доволно за 333 км/ч и забрзување од 0 до 100 км/ч за помалку од 3 секунди.
На изненадување на многумина, покрај громогласниот централно сместен бензинец, како опција има и верзија која се напојува само на струја. Трите електромотори се комбинираат за да произведат 750 коњски сили и 1.350 Nm вртежен момент, а перформансите на автомобилот остануваат исти како во комбинација со V6 моторот. Капацитетот на батеријата е доволен за патување 450 километри.
Со две опции за внатрешни украси (Tributo и Alfa Corse) и безброј опции за прилагодување на каросеријата, Alfa откри дека секој од 33-те примероци на јаглерод-алуминиумската егзотика ќе биде единствен.
