Фернандо Алонсо доби дозвола да настапи на трката за Големата награда на Кина, која во недела ќе се вози на патеката во Шангај. Возачот на Мекларен по првиот слободен тренинг ќе мора на дополнителни тестови, но тоа не би требало да влијае врз првичната одлука на ФИА, која му дозволи на Шпанецот да се врати на патеката.
Алонсо го повреди градниот кош во текот на првата трка оваа сезона, Големата награда на Австралија. Шпанецот сакаше да вози во Бахреин пред две недели, но ФИА процени дека не заздравил од повредата и не му дозволи да вози на патеката „Сакир“.
„Се чувствувам добро. Бев подготвен да возам и во Бахреин, но тогаш сé уште чувствував болки. Ситуацијата сега е многу подбра. Изминатите денови тренирав нормално“, рекол Алонсо.
Трката за Големата награда на Кина, која е трета сезонава во шампионатот на Формула 1, ќе се вози во недела со почеток во осум часот по македонско време.
