Италијанскиот стратег дал ветување дека од просечен клуб ќе го направи Евертон тим од врвот на табелата.
Карло Анчелоти откри дека му ветил на газдата на клубот од Ливерпул дека ќе го претвори неговиот тим во еден од најдобрите во Премиер лигата, ветување кое не е лесно да се оствари.
Сопственикот Фархад Мошири досега има инвестирано 400 милиони фунти во клубот, а не покажува знаци дека ќе ги намали инвестициите, особено со ангажирањето на докажан тренер како Анчелоти.
„Разбирам колку сопственикот е приврзан за клубот и фокусиран на негово подобрување. Тоа е навистина важно и за клубот и за неговите навивачи“, вели Анчелоти.
„Тој има огромна доверба во мене и поради тоа и чувствувам голем притисок. Верува во мене и затоа и ме донесе во Евертон. Ќе го однесам неговиот клуб на врвот. Тоа е мојата цел и она кое му го ветив“.
Британско-иранскиот бизнисмен летово инвестираше 70 милиони фунти во трансфери со цел да му обезбеди на Анчелоти компетитивен состав.
По 12 кола во Премиер лигата Евертон е на 8. место со 20 бодови. Не е убедлив како што очекува Анчелоти бидејќи веќе загуби во четири наврати, но и не заостанува осетливо во однос на водечките Тотенхем и Ливерпул, само 5 бодови.
Денеска гостува кај одличниот Лестер.