За селекторот на македонската фудбалска репрезентација претстојните натпревари од новата сезона на Лигата на нации ќе послужат и како последна проверка за октомврискиот бараж за пласман на ЕУРО против Косово.
Игор Ангеловски утринава го објави списокот на повикани играчи за воведните два натпревара од новата сезона на Лигата на нации на УЕФА.
Македонија отвора на 5 септември дома против Ерменија, а три дена подоцна, на националниот празник 8 Септември, гостува кај селекцијата на Грузија. По овие натпревари, наредниот е веројатно најважниот во досегашната историја на македонскиот фудбал. На 8 октомври Македонија во Скопје го пречекува Косово во полуфиналниот бараж за пласман на одложеното ЕУРО.
„Овие фудбалери на македонската репрезентација веќе подолг период остваруваат одлични резултати, трето место во квалификациите за ЕУРО 2020, прво место во групата од Лига на нации 19/20, пласман во бараж за Европско првенство и очекувам согласно нивниот квалитет да продолжиме со позитивни игри и резултати, а сѐ со цел да ги израдуваме нашите верни навивачи кои ќе ни недостасуваат на овие натпревари. Овие два натпрeвара од новото издание на Лигата на нации, покрај резултатскиот императив ни се добредојдени и за последна проверка во пресрет на натпреварот против Косово на 8 октомври“, истакна Ангеловски, пренесе ФФМ.
Тој од планираните фудбалери не можеше да смета единствено на двајца кои навреме му откажаа, едниот поради повреда, другиот порада корона-карантин. Ангеловски не направи никакви промени во составот во однос на оној со кој настапуваше минатата година во квалификациите за ЕУРО 2020.
„За натпреварите против Ерменија и Грузија се повикани фудбалери на кои сметав подолг период и на претходните натпревари. Поради повреда нема да сметаме на Тихомир Костадинов, а Ферхан Хасани ќе недостасува заради ковид ограничувањата во Финска. Даниел Аврамовски има пријавено повреда, но е вклучен во составот и ќе допатува во Скопје каде што ќе му бидат извршени прегледи од страна на нашиот медицински тим, се надевам дека ќе биде во ред“, вели селекторот.
