Легендарниот Тјери Анри, користејќи го својот пример, се обиде да му објасни на Килјан Мбапе како да се справи со моменталната ситуација во која не е среќен во ПСЖ, при што популарниот Тити зборуваше само за фудбалски работи и што се случува на теренот.
Не навлегувајќи во проблемите што ги има Мбапе со челниците на ПСЖ и генерално лошата клима што се создаде околу клубот, Анри рече дека Мбапе мора во секој момент да го почитува грбот за кој настапува и дека во ниту еден момент не смее да се занесува дека е поголем и поважен од клубот.
Дополнително, тој со сопствен пример му објасни дека понекогаш работите во фудбалот не се идеални, туку дека е потребно човек да се жртвува за тимот.
„Никој не сака да го прави она во што не е добар. Но, постои нешто што е поголемо од сѐ останато, а тоа е клубот. Дали го натераа да се чувствува дека клубот е најважна работа или дека се чувствува поважен од клубот?“, се зачуди Анри и продолжи:
„Ќе го искористам мојот сопствен пример. Мразев да играм високо и широко во Барселона, но го направив тоа за тимот. Откако не знам колку голови постигнав во кариерата, морав да играм по левата страна. И после сѐ, никогаш не сум слушнав некој да каже дека тоа е 'убав гест'“.
На крајот испрати јасна порака до Мбапе и го посоветува како да се однесува во наредниот период.
„Постои само едно правило: ако тренерот побара од вас да направите нешто, направете го тоа за доброто на целиот тим. Ако е лошо, тогаш потребно е да се разговара“, додаде Анри.
Потсетуваме, француските медиуми синоќа објавија информација дека Мбапе сака да го напушти ПСЖ веќе во јануари, што е само половина година откако го продолжи договорот до 2025 година.