Државната комисија за спречување на корупцијата отвара предмет за надзорот на изградбата на автопатите на коридорите 8 и 10д што го врши IRD.
Според ДКСК, треба да се проверат информациите пласирани во медиумите дека фирмата Eptisa, која е дел од IRD, имала забрана од државата за да не биде ангажирана на градежни надзори поради неетичко и непрофесионално однесување, но пред тендерот Владата ја поништила таа забрана.
Велат дека ќе треба време за да се обезбедат сите документи затоа што се работи за огромен тендер.
– Ако се има предвид фактот дека е огромен тендер со голема вредност, мислам дека вреди да се почека да се добие таа документација и дополнително потребно е време за нејзино анализирање. Тие се странски фирми за кои нашето истражување по нив ќе биде малку ограничено. Доколку има потреба ќе се потрудиме да најдеме и дополнителни податоци, за Сител изјави Катица Николовска, член на ДКСК.
Синоќа, лидерот на ВМРО-ДПМНЕ, Христијан Мицкоски, излезе со тврдење дека од 2016 година соппственик на шпанска Eptisa е кинеска компанија и дека генералниот директор на компанијата е Кинез.
Договорот за изградба на четири автопатски делници беше потпишан завчера со конзорциумот Bechtel-ENKA. Според договорот што беше потпишан во Владата, конзорциумот Bechtel-ENKA на 22 април годинава треба да биде воведен во работа за изградба на автопатските делници Тетово-Гостивар (17,5 км) Гостивар-Букојчани (30,3 км) и Прилеп-Битола (39,3 км), а на 12 декември и на делницата Требеништа-Струга-Ќафасан во должина од 21,7 километри. За изградбата на автопатските делници во вкупна должина од 108,8 километри во вредност од 1,3 милијарди евра, изведувачот доби обврска сам или преку домашни проектански фирми и компании истовремено да проектира и да гради.
