По долгогодишни најави, конечно се случи – Apple реши да ја „убие“ апликацијата iTunes. Овој музички сервис беше активен од 2001 година и на почетокот беше сметан за револуционерен, но во последните неколку години ја загуби популарноста и почна да губи корисници.
Всушност, Apple реши да го подели iTunes во неколку различни апликации. Отсега, наместо iTunes, корисниците на Apple ќе имаат пристап до Apple Music, Apple Podcasts и Apple TV.
Шпекулации за гасење на iTunes постоеја уште пред неколку години, но Apple не ги потврди сѐ до вчерашниот WWDC настан во Сан Хозе, на кој покрај оваа вест соопшти уште неколку новости за идното работење на компанијата.
Сите корисници кои ќе сакаат да се логираат на новите сервиси ќе мораат да го направат тоа преку нов запис, во кој мејлот и податоците на корисникот ќе бидат скриени и заштитени. За Windows оперативниот систем, апликацијата iTunes ќе остане непроменета.
„Приватноста е основно човеково право, а ние имаме намера да го почитуваме“, изјави шефот на одделот за софтвер во Apple, господинот Крег Федериги.
Покрај новите апликации, Apple најави дека наскоро пристигнува и новиот оперативен систем iOS 13, кој ќе има различни и подобрени функции, како и промени во интерфејсот. Една од нив е Dark Mode, кој е многу поразличен од оној на Android и е оптимизиран за целиот оперативен систем. Сите iOS апликации ќе имаат темна позадина, по избор на корисникот.
На WWDC беа најавени новите Apple Watch и Mac Pro, кои добија многу критики поради недостатокот од новитети и подобрувања. Иако Mac Pro има прилично моќни спецификации, почетната цена од дури 5.999 долари го прави прескап за обичниот корисник на пазарот, но трошоците не застануваат тука. Цената од 5.999 долари се однесува само на куќиштето, а во цената не се пресметани дисплејот и долната подлога.