Археологијата може да донесе интересни резултати на оние кои се занимаваат со неа. Така на пример, натпис пронајден на локалитет во близина на Галилејското Море ги доведе археолозите до теза дека е откриено местото на раѓање на Апостол Петар.
Според истражувачите кои го ископувале локалитетот Ел Араџ, натписот ја поврзува црквата која ја пронашле таму со црквата на апостолите на Исус, за која се верува дека стоела во Витсаида, родното место на браќата Свети петар и Свети Андреј.
Тоа рибарско село се споменува во Евангелието по Јован, каде се наведува дека тука се родил и Свети Филип заедно со споменатите двајца апостоли. Според истиот извор, во тоа село се случиле две чуда.
Во ископувањата е најдена базилика за која се верува дека е од византиски период, а откриен е и грчки натпис кој говори за „лидерот и заповедник на небесните апостоли“. Оваа фраза обично се поврзува со Свети Петар кој според евангелијата бил избран од Исус за прв лидер на црквата. За тимот, предводен од професорите Мордехај Авијам и Стивен Нотли, ова е доволно за да се заклучи дека е пронајдено родното место на апостол Петар и неговиот брат.
Не ги поколеба ни тоа што референците со кои се раководат потекнуваат пет века по раѓањето на Петар, бидејќи велат дека воспоставената врска меѓу Петар и базиликата е доволно силен доказ, како и фактот дека црквата е посветена на тој апостол.
Секако, ширум светот постојат цркви посветени на Свети Петар, но Ел Араџ е најсилен кандидат за местото каде стоела древната населба Витсаида. Јован тоа место во Евангелието го спомнува како град, но по денешните мерила тоа е всушност мало село. Со оглед на тоа што тројцата апостоли поврзани со Витсаида биле рибари, тоа ја намалува територијата на која живееле, околу подрачјето на Галилејското Море и реката Јордан.
