Финалињата на третото по ранг европско клупско натпреварување за сезоните 2023/2024 и 2024/2025 ќе се играат во Грција и Полска, во градовите Атина и Вроцлав.
По Тирана и Прага, каде се одиграа финалните натпревари Рома - Фејнорд во 2022 и Фиорентина - Вест Хем годинава, наредните две финалиња ќе се играат во грчката престонина Атина и полскиот град Вроцлав. Таква одлука донесе УЕФА и ја соопшти денеска.
Финалето во мај 2024 година ќе се игра на стадионот „Аја Софија“, кој е дом на атински АЕК и има капацитет од 31.100 гледачи. Поради спонзорство стадионот моментално се вика „ОПАП Арена“, но бидејќи УЕФА не дозволува комерцијални имиња во нејзините натпреварувања, стадионот за финалето ќе си биде со старото име.
Во 2025 година финалето ќе се игра на стадионот „Вроцлав“ во истоимениот град, дом на Шлонск, со капацитет од 45.105 гледачи. И тој поради спонзорство сега се води под името „Тарчињски Арена“.
УЕФА ги послуша критиките на навивачите на кои им сметаше тоа што претходните две финалиња се играа на стадиони со помал капацитет, кој не надминува ни 20 илјади. Поради тоа, голем број навивачи од клубовите што играа на финалињата во Тирана и Прага останаа без билети.
Така, на финалето меѓу Фиорентина и Вест Хем на „Фортуна Арена“ во Прага имаше само 17.363 гледачи, а лани на „Арена Комб'таре“ во Тирана имаше 19.597 гледачи на Рома - Фејнорд.
Воедно, УЕФА донесе и одлука за промена на името на ова натпреварување, со тоа што ќе се избрише еден збор. Наместо Европа конференциска лига, натпреварувањето ќе се вика едноставно Конференциска лига. Промената ќе стапи во сила од сезоната 2024/2025. Шпекулациите велат дека УЕФА има намера во ова натпреварување да вклучи и тимови што не се од Европа, поконкретно богаташите од Саудиска Арабија. Но, за тоа времето ќе покаже.