Распродадениот стадион на Интер Мајами го пречека Лионел Меси, а на воодушевените навивачи им го претстави косопственикот на клубот, Дејвид Бекам.
„Многу сум среќен што го избрав овој град со семејството, овој проект, и не се сомневам дека ќе уживаме во него“, рече Меси на презентацијата на преполниот стадион DRV PNK во Мајами.
Аргентинскиот волшебник беше претставен од Дејвид Бекам, еден од косопствениците на клубот, кој и самиот е еден од големите фудбалери кои дојдоа од Европа да играат во американската МЛС.
„Пред десет години тргнав да градам нов тим во МЛС. Тогаш реков дека фантазирам да ги донесам најдобрите светски играчи во Јужна Флорида и прекрасниот град Мајами. Играчи кои ја делат нашата амбиција да го развиваме фудбалот во оваа земја. Затоа, простете ми што бев малку емотивен вечерва. Ова е навистина остварување на сонот. Добредојде во семејството“, изјави Бекам.
Церемонијата на претставување беше одложена за два часа поради големото невреме кое го зафати Мајами, но тоа не ги спречи околу 20.000 фанови да присуствуваат на овој важен настан во голем број.
Истата вечер беше претставен и поранешниот соиграч на Меси од Барселона, Серхио Бускетс, кој исто така потпиша за Интер Мајами.
