Хо, хо, хо! Фудбалските репрезентативци на Белгија во обид да нѐ расположат со своите божикни и новогодишни честитки, го фрлија во смеа фудбалскиот свет кој пука од сеир.
Во најдобра намера да ги израдуваат своите навивачи, неколкумина белгиски репрезентативци на иницијатива на РБФА се собраа на празнична фотосесија. Но, сѐ што успеаја да направат се апсурдни фотки кои освен смеа предизвикуваат и чудење, неверување и сеир.
Браќата Еден и Торган Азар, Аксел Витсел, Кевин Де Брујне, Јаник Караско, Томас Муние и Дедрик Бојата беа дел од учесниците во фотосесијата која ќе ги прогонува до крај на нивните животи. Особено смешен е делот каде Торган седи врз скутот на брат му Еден, како и Витсел во скутот на Бојата.
Караско е единствен кој не делува воопшто задоволен што е дел од празничната фотосесија, иако му дале џемпер на кој стои „I'm sexy and...“.
На фотографиите, кои белгиската репрезентација своите навивачи учитиво ги замоли да си ги симнат на своите уреди, фудбалерите се до украсена новогодишна елка, а се облечени во празнички џемпери.
„Црвените ѓаволи“ дефинитивно станаа „Црвени ангелчиња“, барем дел од нив.
„Овој човек е еден од најдобрите фудбалери денес. Зошто ли сте го натерале да го прави ова?“, е еден коментар под сликата на Де Брујне во навистина несватлив дизајн на џемпер.
