Советникот на Ред Бул Рејсинг, Хелмут Марко, тврди дека болидот на возачите Макс Верстапен и Серхио Перес и натаму тежи 10 килограми повеќе во однос на минималната дозволена тежина пропишана со правилата.
Според правилата на Формула 1 за 2022 година, првично минималната тежина на болидот требаше да биде 795 килограми, но по жалбите на девет од десет тима, минималната тежина беше зголемена на 798 килограми. Болидите на Алфа Ромео се блиску до границата, но многу тимови сѐ уште се далеку од тоа.
Проблемот со тежината е резултат на новите правила. Тимовите мораа да дизајнираат целосно нови болиди за 2022 година, земајќи го предвид буџетскиот лимит. Затоа, тие мораа да донесат паметни одлуки кога се парите во прашање, а во исто време да го развијат најбрзиот можен автомобил. Сепак, овие финансиски ограничувања имаа негативно влијание врз тежината на автомобилот.
Меѓу болидите кои имаат проблем со вишокот килограми е и новиот болид на Ред Бул, а за да биде полесен потребни се многу пари. Така барем тврди Хелмут Марко, кој наведува дека поскапите материјали би го направиле автомобилот полесен. Целта на Ред Бул е да ги комбинира надградбите со полесни материјали. Дизајнирањето полесен материјал и подобрувањето на таа компонента е двојна задача, но со буџетските ограничувања тоа повеќе не е можна мисија за тимовите.
На Ред Бул му треба полесен материјал бидејќи овогодинешните RB18 болиди имаат 10 килограми вишок. На патека како онаа во Саудиска Арабија, прекумерната тежина прави разлика помеѓу три и пол и четири десетинки. Сепак, Ред Бул не е единствениот тим со болид со прекумерна тежина, така што конкурентите сепак немаат толку голема предност.