Доривал Жуниор е новиот селектор на Бразил, потврди Саун Паулу, клубот со кој искусниот стручњак го раскина договорот.
„Нашиот клуб го најавува заминувањето на тренерот Доривал Жуниор, кој побара раскин на договорот за да ја преземе командата со бразилската репрезентација“, беше објавено на официјалната веб-страница на Саун Паулу.
Се очекува официјално соопштение на Бразилската фудбалска конфедерација и објавување на деталите од договорот, кој, според медиумите, ќе биде потпишан до летото 2026 година.
Бразил го отпушти Фернанду Динис во саботата поради лошите резултати на тимот во претходните месеци.
После шест кола одиграни во квалификациите за Мундијалот 2026, Бразил има освоено само 7 бодови и е на шестото место, последното што гарантира директна виза за завршницата.
Доривал Жуниор (61) во својата богата тренерска кариера ги водеше скоро сите бразилски гиганти: Фламенгу, Палмејрас, Сантус, Флуминенси, Васку да Гама, Крузејру, Интернасиунал…
Минатата 2023 сезона со Саун Паулу го освои бразилскиот куп, додека претходната 2022 го предводеше Фламенгу до тутулата во Копа Либертадорес, а го освои и домашниот куп.