Американската Агенција за храна и лекови вчера даде одобрение за итна употреба на тест за коронавирус што го направи компанијата Abbott Laboratories, кој се очекува да одговори на потребата од повеќе тестирања за COVID-19 во земјата.
Од компанијата велат дека планираат да испорачаат десетина милиони тестови во септември, а ќе можат да го зголемат производството на 50 милиони тестови во октомври.
Тестот со големина на кредитна картичка кој чини само 5 долари, може да го изведат лекари, медицински сестри и медицински асистенти, а резултати се добиваат за 15 минути.
Новиот тест се вика BinaxNOW COVID-19 Ag Card, а се препорачува да се направи во рок од седум дена откако ќе ги почувствувате првите симптоми на коронавирус.
Заедно со тестот кој функционира врз основа на земен брис од нос, Abbot ја пушти и бесплатната апликација NAVICA за iPhone и Android смартфони.
Некои здравствени работници и законодавци рекоа дека овој тест е одличен бидејќи е евтин, па така ќе може да се направи масовно тестирање, што е најдобар начин за детектирање на заразените и спречување на ширењето на заразата.
