Косопственикот на Лос Анџелес Лејкерс, Тод Боли, се согласил да го купи Челси, соопшти лондонскиот клуб.
Боли, заедно со деловните партнери Марк Волтер, Хансјерг Вис и компанијата Clearlake Capital, се договорија да го преземат Челси за 3 милијарди евра.
Боли има 27 отсто од акциите во Лос Анџелес Лејкерс, а во својата деловна империја поседува и акции од безбол тимот Лос Анџелес Доџерс и WNBA тимот Лос Анџелес Спаркс.
Челси соопшти дека клубот официјално ќе биде префрлен во сопственост на Боли до крајот на месецот откако британската влада ќе издаде дозвола.
Боли е 46-годишен американски бизнисмен со германско потекло, кој поминал дел од својот живот во Англија.
Според Forbes, Боли „тежи“ 4,5 милијарди долари, а освен во спортот, неговата деловна империја се шири и во многу други гранки како што се недвижнини, медиуми, развој на компјутерски игри, прехранбена индустрија...
Интересно е што во 2019 година тој му понуди слична сума на Роман Абрамович за купување на Челси, но рускиот олигарх тогаш ја одби понудата.
Но, сега мора да ја прифати, со оглед на санкциите што му беа наметнати како близок соработник на Путин. Парите што ги плаќа Боли ќе бидат префрлени на посебна сметка во Англија, а Абрамович се обврза да ја донира целата сума на украинскиот народ во хуманитарни цели.
Во договорот е дефинирано и дека Боли е обврзан да инвестира уште 2 милијарди евра во Челси во наредниот период.
