Истражување предводено од проф. Хацухико Хајаши од Универзитетот во Осака, беше претставено во средата на Самитот за уредување човечки гени во Институтот Крик во Лондон.
Научниците велат дека одгледале глувци користејќи јајца добиени од машки клетки, откритие што еден ден би можело да го отвори патот на човечките машки парови да имаат деца.
Истражувачите тврдат дека успешно создале јајца со конвертирање на машки XY парови на хромозоми од кожата на машки глувци во женски XX парови на хромозоми, објави New Scientist.
Ова беше постигнато со претворање на клетките на кожата во матични клетки, бришење на хромозомот Y, копирање на хромозомот X и потоа спарување на копиите со оригиналните Х хромозоми.
Ова овозможува да се програмира матичната клетка да стане јајце-клетка. Јајце-клетка потоа била оплодена со сперма од друг глушец.
Истражувачите велат дека техниката била искористена за создавање на седум бебиња глувци, кои изгледале здрави и имале нормален животен век.
И тие веруваат дека оваа техника еден ден би можело да се искористи за да им се овозможи на човечките машки парови да имаат деца заедно користејќи јајце-клетки создадени од нивните сопствени клетки.
Може да се користи и за лекување на Тарнеров синдром - генетска состојба која ги погодува само жените и се јавува кога еден од Х-хромозомите недостасува или делумно недостасува.
Но, професорот Хајаши од Универзитетот во Осака, кој го спроведе истражувањето и го претстави на Самитот за уредување човечки гени во Институтот Крик во Лондон во средата, рече дека може да поминат години пред неговата техника успешно да се користи во човечките клетки.
Тој, исто така, предупреди дека ова може да биде тешко да се реплицира со човечки клетки, за кои е потребен подолг период на култура за да се произведе зрела јајце-клетка.
Професорот Митинори Саиту, кој исто така зборуваше на настанот, рече дека подолгиот период на одгледување ги зголемува шансите клетките да акумулираат абнормалности.
Но, професорот Хајаши рече дека е оптимист дека сегашните проблеми може да се надминат во рок од десет години и дека неговиот тим сега ќе се обиде да ја повтори студијата со човечки клетки.
Професорот Џорџ Дејли од Медицинскиот факултет Харвард, кој не бил вклучен во истражувањето, го опишал како „фасцинантен“.
Но, тој рече дека користењето на оваа техника на човечки клетки ќе биде „потешко отколку кај глувци“.
Резултатите од студијата сега се доставени за објавување во научното списание Nature.