Бразилскиот фудбалер Дани Алвес одбил посета од мајка му во затворот во Барселона, а во исто време изјави дека е подготвен да се справи со сè што го чека.
Мајка му Лусија пристигнала во Барселона од Бразил, но Дани бил категоричен и ја одбил посетата наведувајќи дека се срами и не сака мајка му да го види во затвор.
Сепак, двајцата разговарале по телефон, а мајка му останала во хотел во Барселона за да остане блиску до синот.
Во исто време, весникот La Vanguardia пренесува дека Алвес се огласил за прв пат откако е зад решетки. Во разговор со други затвореници, рекол:
„Ќе прифатам што и да се случи. Не се плашам од ништо. Излегов од дома на 15 години, поминав низ потешки искушенија од ова. Не се плашам од ништо", ги пренесува каталонскиот весник неговите први зборови од затвор.
Неговиот адвокат Кристобал Мартел ќе поднесе жалба во текот на денот и ќе побара негово привремено ослободување во следните неколку недели.
Адвокатскиот тим на Алвес смета дека има доволно аргументи за привремено ослободување, и тие се подготвени да дадат гаранции дека бразилскиот фудбалер нема да ја напушти земјата.
Да потсетиме, Алвес е обвинет од девојка која во изјавата во полиција рекла дека на 30 декември, Бразилецот ја однел во тоалетот во ноќен клуб каде и двајцата се забавувале, ја заклучил таму и сексуално ја нападнал.
Доколку биде прогласен за виновен, Алвес се соочува со затворска казна од 4 до 12 години и многу веројатно крај на кариерата.
