Интересна размена е на повидок откако Гарет Бејл дојде на чекор до враќање во Тотенхем, а во спротивен правец би можел да замине бисерот Деле Али.
Според The Telegraph, лондонскиот клуб размислува да му дозволи на 24-годишниот треквартиста да си замине затоа што по секоја цена сака да го врати назад Гарет Бејл.
Реал и Тотенхем веќе се во преговори за трансфер на Бејл, а планот на газдата на Спарс е да му дозволи на Али да се пресели на „Сантјаго Бернабеу“ со оглед на тоа што на „Кралевите“ очајно им треба „десетка“.
На тој начин Тотенхем не само што не би платил ниту фунта за Велшанецот, туку и би остварил профит бидејќи вредноста на Али е дупло повисока од онаа на 31-годишниот Бејл.
Звучи чудно зошто Тотенхем така лесно би се ослободил од својот талентиран офанзивец, но гласините од Островот велат дека Жозе Мурињо е тој што ѝ дал зелено светло на управата да го продаде Али бидејќи не е задоволен од неговото залагање на тренинзите и натпреварите. Португалскиот стратег и Али веќе имале вербална расправија откако Мурињо го нарекол „мрзлив“ на една тренинг сесија.
