Младата репрезентација на Македонија денеска ги започнува подготовките за двата квалификациски натпревари за пласман на ЕУРО 2025, кои ќе ги одигра на домашен терен против Гибралтар и Шведска.
Македонија У21 на селекторот Драги Канатларовски прво в четврток на 21 март ќе го нагости Гибралтар, а потоа во вторник (26 март) ќе ја пречека Шведска. Двата натпревара се играат на Националната арена „Тодор Проески“ во Скопје, но со почеток во 14:00 часот, многу непопуларен термин среде работен ден.
Стандардниот член на младата репрезентација на Македонија и фудбалер на прволигашот Работнички, Стефан Деспотовски, даде свој коментар за предизвиците што ги очекуваат младите репрезентативци во следниот период.
„Со нетрпение ги очекуваме дуелите со Гибралтар и Шведска. Играме на домашен терен, што претставува позитивна работа за нас. Сакаме да покажеме дека победата над Шведска во првото коло не беше случајна. Најпрво треба да одиграме со Гибралтар. Фокусирани сме максимално на тој меч, кој мораме да го добиеме“, почна Стефан, пренесува ФФМ.
„Овие квалификации ги започнавме одлично, со големата победа над Шведска на гостински терен, но се случи пад во нашата игра и забележавме три порази во серија. На некои натпревари среќата воопшто не ни се насмевна. Одигравме добар дуел со фаворитот во групата, Холандија, но на крајот несреќно загубивме, а Молдавија од два обида успеа да постигне два гола. Ги оставаме овие натпревари позади нас, ни претстојат два меча во кои мораме да покажаме голема желба за победа. Треба да покажеме и потрвдиме дека сме силна репрезентација која располага со квалитет. Се надевам дека ќе почнеме да остваруваме позитивни резултати“.
„Имаме игра, создаваме шанси, располагаме со цврстина и квалитет, сѐ што би требало да ја краси една квалитетна репрезентација. Мислам дека треба да бидеме многу поефективни и помудри во завршницата на акците и да ги реализираме шансите со погодок“.
„Имаме одлична атмосфера во репрезентацијата. За сите нас преставува огромна чест и задоволство да се носи овој дрес. Со нетпрение очекуваме повторно да го облечеме дресот со државен грб и да излеземе пред нашите навивачи. Време е да се вратиме на победничките патеки“.
Во досегашниот тек од квалификациите младите „Рисови“ зарочараа остварувајќи само 1 победа и 3 порази. Македонија нема никакви шанси за првото место кое води на завршницата, но мора да го поправи впечатокот на резултатски план. Гибралтар на хартија делува како тотален аутсајдер, но успеа на гости да ја победи Молдавија со 2:1, репрезентација од која ние изгубивме.
