Левото крило на Вардар на денешниот натпревар постигна голем јубилеј - стигна до бројката од илјада голови во најквалитетното европско клупско натпреварување.
Вардар во моментов игра на гости кај унгарски Сегед и на полувреме губи со 17:15. Освен тесниот резултат, првиот дел го одбележа и илјадитиот гол на Тимур Дибиров.
Тој за половина час игра на паркетот во салата „Ујсегед“ постогна 4 гола, а со третиот означи голем јубилеј - 1.000 голови во Лигата на шампионите на ЕХФ.
38-годишниот Русин ја игра 18-тата сезона во Лигата на шампионите. Првите 9 ги одигра за Чеховскије Медвједи, а од 2013 ги брани боите на Вардар.
Токму со Вардар освои две титули во ЛШ во сезоните 2016/17 и 2018/19. Во три сезони успеваше да постигне по 78 голови и тоа 2014/15, 2015/16 и 2018/19, сите со Вардар.
На вечната листа на ЕХФ ЛШ Дибиров е четврти најдобар стрелец со 1.001 гол, зад Микел Хансен, Никола Карабатиќ и лидерот Кирил Лазаров.