Во Германија, половните автомобили се зголемија за речиси една третина во рок од една година, според Агенцијата за анализа на пазарот DAT.
„Во април, вообичаениот автомобил стар три години со бензински мотор беше за 30,1 отсто поскап од сличен автомобил во април минатата година“, покажува анализата на DAT. Во просек, автомобил стар три години со бензински мотор чинел 27.900 евра.
Дизелашите поскапеа повеќе од бензинците
Автомобилите со дизел мотори поскапеа уште повеќе, за 31,8 отсто, а за „дизелаши“ стари три години во просек требало да се издвојат 28.960 евра.
Според аналитичарите, цените на половните автомобили растат поради намалената понуда на нови. Кризата со корона влијаеше на недостигот на чипови и други делови за автомобилската индустрија, што го намали капацитетот.
Истовремено, цените на новите автомобили пораснаа за седум отсто во последните три години. Значителниот пораст на цените на половните автомобили не се однесува само на автомобилите до три години, туку и на постарите модели.
Кога понудата е ограничена, побарувачката расте
„Кога понудата е ограничена, побарувачката за постари модели расте, а тоа секако ја зголемува цената“, изјави портпаролот на агенцијата DAT.
Дебатата што се одржа во Германија во пресрет на корона кризата, која предвидуваше дури и делумна забрана за дизел автомобили, веќе не влијае на намалената побарувачка за овие возила, што беше забележливо среде таа дебата.
Според DAT, но и најголемиот интернет портал за половни автомобили mobile.de, има побарувачка за користени „дизелаши“, особено за оние со помоќни мотори.
