Дресот што Диего Армандо Марадона го носеше во финалето на Светското првенство 1986 во Мексико во кое Аргентина ја победи Западна Германија е вратен на Фудбалската асоцијација на Аргентина (АФА).
Поранешниот германски репрезентативец Лотар Матеус, кој на полувремето од тоа финале ги замени дресовите со Марадона, 36 години подоцна му го подари на аргентинскиот народ, пренесоа локалните медиуми.
Претходно оваа година, дресот што Марадона го носеше во четвртфиналето против Англија, кога го постигна прославениот гол наречен „Божја рака“ беше продаден на аукција за рекордни 7,1 милиони долари.
Тој дрес на аукција го стави поранешниот англиски репрезентативец Стив Хоџ, но и покрај астрономската цена што ја достигна, Матеус во изјава за Daily Mail рече дека воопшто не помислувал да заработи на дресот на Марадона.
„Ова е приказна за германскиот капитен кој имаше аргентински пријател. И како и сите пријатели, го разменија најдоброто што го имаа – прегратка, совет и дрес“, наведе АФА во видеопорака по повод „подарокот од Матеус за аргентинскиот народ“.
