Меѓународната фудбалска федерација (ФИФА) покрена истрага по обвинувањата за сексуална злоупотреба во репрезентацијата на Замбија за време на Светското првенство за жени што се одржа во Австралија и Нов Зеланд.
ФИФА денеска најави строги казни доколку истрагата покаже дека обвиненијата се основани.
Неколку медиуми објавија дека селекторот на Замбија, Брус Мвепе, е обвинет за сексуална злоупотреба, наводно допрел фудбалерка за градите пред натпреварот со Костарика, но ФИФА не објави детали од истрагата.
„Можеме да потврдиме дека наводите што ги добивме се однесуваат на репрезентацијата на Замбија и дека истрагата е во тек. Секое тврдење за несоодветно однесување го сфаќаме многу сериозно и постои јасна процедура за пријавување на такви случаи“, соопшти ФИФА.
Фудбалската асоцијација на Замбија во петокот соопшти дека не добиле никаква пријава, ниту од играчот, ниту од кој било друг член на делегацијата што отпатува на Светското првенство.
„Затоа бевме изненадени кога слушнавме за наводното несоодветно однесување на тренерот, за што The Guardian објави на својот онлајн портал“, изјави генералниот секретар на Фудбалскиот сојуз на Замбија, Рубен Каманга, додавајќи дека сите тренинзи на тимот биле снимени.
За инцидентот не била информирана ниту полицијата на Нов Зеланд, која рекла дека не добила никаква пријава.
„Сепак, ни беше посочен можен инцидент. По првичната истрага не се преземени дополнителни дејствија“, изјави портпаролот на полицијата.
Тренерот Брус Мвепе е под истрага за наводни сексуални напади во последните месеци. Фудбалскиот сојуз на Замбија потврди дека истрагата е отворена, но дека никогаш не добиле никакви официјални жалби. Мвапе постојано беше испрашуван за време на прес-конференциите за време на ова Светско првенство за наводите за сексуална злоупотреба, но тврдеше дека сите наводи се лажни.
Замбија го заврши натпреварувањето во групата Ц со освојување на третото место со победата над Костарика (3-1), по двата убедливи порази од Јапонија (5-0) и Шпанија (5-0).
