Многупати до сега во нашите лаборатории во МАНУ има констатирано мали мутации на вирусот. Мутацијата во Обединетото Кралство е практично мутација во повеќе делови на структурата на вирусот, но тоа нема никаква улога во однос на ефикасноста на вакцината, изјави денеска министерот за здравство, Венко Филипче.
Тој појасни дека според одредени шпекулации, мутацијата во повеќе делови во структурата на вирусот, повеќе ја зголемува трансмисијата на вирусот, бидејќи посилно се врзува за клетката домаќин.
– Многупати до сега беше констатирано во лабораториски услови мутација на вирусот. И кај нас, во нашите анализи кои што ги лабораторијата во МАНУ има констатирано некои мали мутации. Оваа мутација за која објавија медиумите која е откриена во Обединетото Кралство е практично мутација во повеќе делови на структурата на вирусот посебно во делот што се врзува со клетката домаќин, рече Филипче во одговор на прашање.
Сепак, според неговите сознанија, тоа воопшто нема никаква улога во однос на ефикасноста на вакцината.
– Можеби има и дополнителни испитувања кои се прават, тоа што има мутација во повеќе делови во структурата на вирусот, еве има шпекулација дека можеби повеќе ја зголемува трансмисијата, а во смисла на тоа да посилно се врзува за клетката домаќин заради тоа што токму во тој дел е мутацијата, додаде Филипче.
Со цел поголема внимателност, Филипче потсети дека вчера се забранија летовите со Обединетото Кралство. Сепак, посочи дека уште е рано за некаква констатација за тоа дали треба дополнитела форма на вакцина, поради оваа мутација на вирусот.
– Еве и ние бевме внимателни, вчера ги прекинавме летовите со Обединетото Кралство така што мислам дека е рано за некаква констатација во однос на тоа дали треба или не треба дополнителна форма на вакцина и така натаму, засега сметам дека не. Тоа беше пакет на мерки, освен забрана, има и задолжителна изолација од 14 дена на сите кои треба да пристигнат од Обединетото Кралство по кој било пат, на аеродромите или по сувоземен пат. Сите кои доаѓаат и во следниот период, рече министерот.