Во време кога ширум САД се одржуваат протести против расизмот и полициската бруталност, откако Афроамериканец беше неправедно убиен при апсење, а светот одговара со силна морална поддршка, едукацијата за историските и сегашните настани е многу важна.
Токму оваа порака ја испраќа и Netflix. Популарната стриминг платформа објави колекција филмови, серии и документарци насловена Black Lives Matter (Животите на црнците се важни) преку кои се раскажуваат приказни за искуствата на луѓето со темна боја на кожата.
Некои од најпопуларните содржини во едукативната колекција се „Orange is the new black“, „Dear white people“, „Moonlight“, меѓу другите.
„Кога ќе речеме Black Lives Matter (Животите на црнците се важни) ние мислиме Black storytelling matters (Важно е да ја раскажеме приказната за црнците, од сите аспекти)“, објавија од Netflix на Twitter.
Оттаму додаваат дека внимателно го направиле изборот на содржини со фокус на расната неправда во САД.
Netflix е една од првите компании во шоубизнисот која јавно и содржајно го поддржа движењето Black Lives Matter. Велат дека имајќи ја предвид популарноста на платформата, чувствуваат должност да бидат гласни во име на сите нивни корисници, вработени и автори со темна боја на кожата.
„Сфаќаме дека ќе треба да помине време додека нашата посветеност на каузата резултира со вистинска, системска промена, затоа почнуваме со ставње акцент на моќните и комлексни наративи за искуствата на црните луѓе“, велат од Netflix.