Премиерката на Финска, Сана Марин и претседателот на државата Саули Нинисте соопштија дека Финска треба да поднесе барање за придружување кон НАТО.
На заедничка прес-конференција, претседателот и премиерката нагласија дека барањето за членство ќе биде предадено многу брзо.
„Финска без одложување мора да поднесе барање за членство во НАТО“, изјавија Марин и Нинисте.
Ова е прва официјална најава на финските државници и знак дека Финска има намера да аплицира за членство во оваа организација.
„Членството во НАТО би ја зацврстило безбедноста на Финска. Како членка, би го зацврстиле целиот сојуз. Финска итно мора да поднесе барање за членство во НАТО. Се надеваме дека чекорите потребни за носење одлука ќе бидат преземени во следните денови“, стои во заедничката изјава.
Откако Комитетот за надворешни работи донесе одлука за тоа дали на Финска ѝ е неопходно влегување во НАТО, парламентот ќе организира вонредна седница на која ќе се расправа за овој извештај. Доколку парламентот го оцени извештајот за позитивен, Финска ќе го извести НАТО за тоа дека сака влез во организацијата по што ќе пристапи кон процесот.
