Финска планира да понуди превентивна вакцина против птичјиот грип на луѓето кои се изложени на работа со животни веќе следната недела и е првата земја во светот што го прави тоа, соопштија вчера здравствените власти.
Финска купи вакцини за 10.000 луѓе, секоја составена од две инјекции, од производителот CSL Seqirus, како дел од заедничката набавка на ЕУ до 40 милиони дози за 15 земји.
Европската комисија потврди дека Финска ќе биде првата земја во светот која ќе започне со вакцинирање на луѓето против птичјиот грип.
„Вакцината ќе биде понудена на сите постари од 18 години кои се изложени на зголемен ризик да заболат од птичји грип поради природата на нивната работа или други околности“, соопшти Финскиот Институт за здравје и благосостојба (THL).
THL наведува дека Финска има голем број фарми за одгледување животни поради нивното крзно, кое може да дојде во контакт со диви животни, а инфекциите со птичји грип се чести кај визон и лисици.
Видот на птичјиот грип H5N1 уби стотици милиони живина ширум светот во последниве години и се повеќе се шири кај цицачите, вклучително и кравите во САД, а во некои случаи и кај луѓето.
Финска досега не открила ниту еден случај на човечка инфекција со вирусот, но е решена да ја понуди вакцината поради здравствените ризици за луѓето кои работат со животни, додава THL.
Минатата година, инфекција со птичји грип избувна во фарми за крзно на отворено во Финска, а властите наредија убивање на околу 480.000 животни, главно визони, за да се спречи ширењето на вирусот на други животни и луѓе.
Доколку се открие присуство на птичји грип кај луѓето, вакцината ќе им биде понудена на сите блиски контакти, додава THL. Птичјиот грип е предизвикан од вирусот на грип од типот А.
