Луда фудбалска претстава на македонската репрезентација во Ерменија. Пукна петарда, домаќинот тотално надигран и на крајот понижен со високи 5:0 и воедно одмазда за поразот од 4:0 пред три години.
Милевски натпреварот го започна со Столе Димитриевски на голот, во одбраната Езџан Алиоски лево, Висар Муслиу и Дарко Велковски како централни бекови, а на местото на суспендираниот Стефан Ристовски се најде Стефан Ашковски. Во средината Елиф Елмас, Тихомир Костадинов и Енис Барди, додека во нападот по крилните позиции искусниот Александар Трајковски и Дарко Чурлинов, а најистурен младиот Милан Ристовски.
Поради отсуството на капитенот Стефан Ристовски, за прв пат капитенската лента доби чест да ја носи Енис Барди.
Од почеток Македонија ја презеде контролата и иницијативата, не давајќи им на домаќините лесен пристап до голот, иако неколку пати тоа им успеа. Во 3. минута Барди нафрли од корнер, а Ристовски го промаши голот. Во 14. минута Бриаско промаши за Ерменците, шутирајќи над пречката. Кратко потоа мешаница во казнениот простор на гостите, а не се снајде Муслиу и промаши.
Во 22. минута падна првиот гол. Ашковски изведе аут, топката веднаш се врати кај него и успеа да се пробие нанижувајќи неколкумина ерменски фудбалери пред да му сервира на тацна на Трајковски, кој само ја втурна топката во празниот гол.
Поранешниот напаѓач на Вардар, Барсегјан, во 32. минута упати силен удар, но топката само профучи крај левата статива, а голманот Димитриевски заврши токму во дирекот по што мораше да му биде укажана лекарска помош.
Четири минути подоцна и нов шок за домашните. Барди се најде осамен на осумнаесетина метри, Елмас веднаш му додаде, а овој без размислување упати прецизен удар во левиот долен агол и зголеми на 2:0.
Во 41. минута Трајковски беше себичен кога од лево наместо да проигра во петерецот се реши да шутира, а Јурченко го одбрани неговиот удар, па на пауза се замина со истиот резултат.
Во вториот дел иста слика на теренот: Македонија игра и создава шанси, Ерменија се мачи иако направи две измени.
65-тата минута беше во тек кога другиот поранешен играч на Вардар, Ховханес Хамбарѕумјан, го собори Барди во шестнаесетникот и Македонија доби пенал. Барди ја зеде одговорноста и со убав удар го совлада Јурченко за 0:3.
Во 79. минута одлична контра на Македонците. Елмас му сервираше на Ристовски кој погоди за 0:4.
Да биде бламажата на домашната репрезентација конечна стигна нов пенал и тоа по прекршокот на Тертерјан над Алиоски во последната минута. По втор пат Барди застана над белата точка, а овој пат Јурченко за малку не му го одбрани пеналот - 0:5 за Македонија.
Енис Барди е петтиот фудбалер во историјата на македонската репрезентација кој успеал да постигне хет-трик. Претходно тоа им успеа на Бошко Ѓуровски, Дејви Главевски, Артим Шаќири и Александар Трајковски.
Оваа победа е израмнување на втора највисока, заедно со оние над Малта во 2002 и Лихтенштајн во март годинава од 5:0, а зад онаа недостижна од 11:1 над Лихтенштајн од 1996.
Во нашата група вечерва од 20:45 играат Романија и Исланд, натпревар кој за нас е и тоа како важен бидејќи потребен ни е кикс на Романците за во последното коло, кое се игра в недела, да влеземе како второпласирани. Доколку Романија слави вечерва, тогаш шансите ќе бидат рамни на научна-фантастика бидејќи тие во последното кола играат со слабиот Лихтенштајн, против кој тешко е за верување дека не би победиле.
Моментална табела:
- Германија 21
- Македонија 15
- Романија 13
- Ерменија 12
- Исланд 8
- Лихтенштајн 1