Српскиот тенисер Новак Ѓоковиќ е во Рим каде ја брани титулата на Мастерсот освоена во 2022 година.
Времето кое го минува во италијанската престолнина го искористи за да зборува за весникот „Кориере дела сера“, а неизбежна тема беше односот со преостанатите двајца членови на „големата тројка“, Роџер Федерер и Рафаел Надал.
Со вкупно 64 грен слем титули, Србинот, Шпанецот и Швајцарецот се тројцата најуспешни тенисери во историјата. Ѓоковиќ и Надал имаат по 22, а Федерер 20 грен слем трофеи.
Ѓоковиќ го разјасни односот со Роџер Федерер.
„Никогаш не сме биле пријатели, тоа не е можно меѓу ривалите, но никогаш не сме биле ниту непријатели. Отсекогаш сум го почитувал Федерер, Тој е еден од најголемите на сите времиња, имаше неверојатно влијание, но никогаш не бевме блиски“, изјави Ѓоковиќ за „Кориере дела сера“.
Неизбежна тема секако е и Рафаел Надал.
„Рафа е само една година постар од мене, двајцата сме Близнаци во хороскоп, а на почетокот дури двапати излеговме на вечера. Но, дури и со него пријателството е невозможно. Отсекогаш сум го почитувал и многу му се восхитував. Благодарение на него и на Федерер станав тоа што сум. Нашите ривалства засекогаш ќе нè обединуваат и затоа сум им благодарен. Надал е дел од мојот живот, во последните петнаесет години го гледам повеќе од мајка ми“, објаснува 35-годишнот Ѓоковиќ.
