Во стилот на големиот Диего Марадона играчот на Пелистер претрча половина терен минувајќи ги сите кои му се најдоа на патот за на крајот да ја затресе противничакта мрежа.
Кој вели дека во македонската фудбалска лига нема убави голови?
Дека тоа не е вистина посведочи натпреварот во неделата во Битола каде се сретнаа Пелистер и Беласица. Домашното крило, Сенегалецот Умар Гудиаби, постигна неверојатен гол, ремек дело кое ретко кому му се остварило.
Во 76. минута од натпреварот, при водство на неговиот тим од 1:0, Гудиаби тргна од својата половина крај левата аут линија, мина пет противнички фудбалери, влезе во петерецот и таму го совлада и струмичкиот голман поставувајќи ги конечните 2:0.
Губиаби е всушност играч на скопски Шкупи кој како позајмен сезонава настапуваше за битолската гордост и по завршувањето на сезоната треба да се врати во редовите на чаирчани. Пролетниов дел, колку што беше во Пелистер, одигра 14 натпревари, постигна 4 гола и 5 пати асистираше.
Голот „Под Тумбе Кафе“ страшно наликува на два познати гола. Првиот, оној на Дуего Армандо Марадона од Светското првенство 1986 година кога со неверојатен слалом ја растури англиската одбрана постигнувајќи го, веројатно, најпознатиот гол во историјата на фудбалот, гол кој стана познат како „Гол на векот“.
Друг ваков индентичен гол исто така падна на еден Мундијал, овој во 1994 година во САД. Тогаш анонимниот играч на Саудиска Арабија, Саид Ал-Оуајран, во 5. минута ја прошета целата белгиска екипа пред да го совлада легендарниот Мишел Пруд'ом, гол со кој Саудијците ја победија Белгија за големо изненадување.