Компанијата HMD Global прави обиди да се позиционира подобро на светскиот пазар на смартфони, а новиот модел Nokia X71 се очекува дека ќе помогне кон искачување на самиот врв.
Смартфонот премиерно беше претставен во Тајван и тој се одликува со моќни перформанси, кои ќе му понудат на купувачот неверојатно корисничко искуство.
Nokia X71 доаѓа со процесор Snapdragon 660 и оперативен систем Android Pie, како и 6GB RAM кој ќе одговори дури и на вашите најголеми барања. Смартфонот има 128GB внатрешна меморија, која може да се прошири со microSD мемориска картичка.
На задната страна од уредот се наоѓа систем од три камери со Zeiss сертификат, од кои едната има леќа од 48 мегапиксели. Ултраквалитетните фотографии од камерата ќе се прикажуваат на LCD 6,39-инчниот екран со Full HD+, а смартфонот е напојуван од батерија со 3.500 mAh.
Се работи за солиден смартфон со средни спецификации кои доаѓаат од компанијата што сака да се натпреварува за преземање на главната улога во сегментот на телефони веднаш под флегшип компаниите за Android OS – Samsung и Huawei.
Оваа година камерата на Sony со 48 мегапиксели се покажа како многу популарно решение, бидејќи таа е евтина, а моќна. Покрај на Nokia X71, таа може да се најде и на Redmi Note 7, кој чини само 150 долари.
Сепак, HMD Global реши да не го продава овој телефон по толку ниска цена, па реши дека тој ќе се појави на пазарот по цена од 345 долари, а ќе има и верзија од 385 долари. Продажбата започнува на 30 април, а истиот смартфон на западниот пазар ќе се продава под името Nokia 8.1 Plus.
