Незадоволен што е резерва, Швеѓанецот со македонско потекло се побуни против селекторот, а поддршка доби и од Златан Ибрахимовиќ.
Шведска во саботата играше дома против Франција во воведното коло од својата група во Лигата на нации и загуби со 0:1. Младиот Дејан Кулушевски, кој ја одби Македонија за да игра за Шведска, почна од клупата и влезе во игра во 70. минута на местото на Себастијан Ларсон.
Новиот играч на Јувентус по натпреварот се побуни дека многу доцна бил ставен во игра и немал време да промени нешто бидејќи Франција водеше уште од пред паузата.
Во негова одбрана застана и легендата Златан Ибрахимовиќ кој преку Twitter ги нападна луѓето во Шведската фудбалска федерација оквалификувајќи го изоставувањето на Дејан од првите единаесет како „несмасна шега“.
„Каква несмасна шега.
Уште еден доказ.
Неспособни луѓе на погрешни позиции кои го задушуваат шведскиот фудбал.“, напиша Ибрахимовиќ на својот Twitter профил.
Селекторот Јане Андерсон доби низа прашања зошто Кулушевски не го почнал натпреварот, но одби да одговори.
Шведска утре вечер го игра вториот натпревар и тоа против актуелниот бранител Португалија.