Советничката од Левица во Општина Штип ги повика сите останати општини да го следат нивниот пример и да ги потпишат свечените изјави користејќи го името согласно Уставот од 1991 година.
„Министерството за надворешни работи нема право да реагира и да се меша во работата на локалната самоуправа. А за тоа дека не им држат аргументите за наводно кршење на Уставот има повеќе причини, бидејќи самото насилно менување на името од почеток до крај беше силување и прекршување на Уставот“, вели Сенада Ибраимова, која како носител на листа влезе во Советот на Општина Штип од редовите на Левица.
„Законот за локална самоуправа не е сменет, односно таму во делот за давање на свечената изјава експлицитно стои Република Македонија, а документите кои ги изработува општинската служба мора да се базираат на овој Закон – така што нема ништо спорно во тоа што свечената изјава ја потпишавме со правилното име – Република Македонија како што стои во самиот Закон“, аргументира таа.
Покрај Штип, каде советниците на СДСМ одбија да ги потпишат изјавите со старото уставно име, во Општина Аеродром советниците од сите партии ставија потпис под името Република Мкаедонија. Ибраимова ги повика и останатите општини да го почитуваат Законот за локална самоуправа, кој не сменет според новото уставно име.
„Токму другите општини треба да ги променат изјавите, повикувајќи се на овој Закон, во спротивно работат противправно“, додаде.
