Вонредниот инспекциски надзор на Службата за итна медицинска помош во Струга од Државниот санитарен и здравствен инспекторат (ДСЗИ) почнал вчера, извести министерот за здравство, Фатмир Меџити. Инспекцијата влезе во Здравствениот дом откако тим од Итната помош застанал да пие кафе на бензинска станица додека во комбето останал да лежи пациентот што го пренесувале од Скопје до Струга, а министерот Меџити најави истрага и ригорозни мерки доколку се утврдат злоупотреби.
„Инспектори од ДСЗИ вчера беа на самото место. Сè уште го немаме конкретниот извештај. Бевме во комуникација со директорот на Здравствениот дом и го чекаме извештајот“, рече министерот Меџити и најави дека извештајот ќе го сподели со јавноста кога ќе го добие.
Меџити за овој случај беше известен во понеделникот од новинарка на брифингот за реформи во примарното здравство. Следниот ден за Макфакс потврди дека имало такво кафе-пиење од Службата за итна медицинска помош. Рече дека застанувањето било на барање на ќерката на пациентот во комбето, а за која Меџити објасни дека барала да застанат оти цел ден не јадела и не пиела. Министерот објасни дека и покрај барањето на ќерката, здравствените работници не смееле на тој начин да направат пауза.
