„Al Ba’sa“, или во превод „инает“, е името на најтесната зграда во Бејрут, Либан, а многумина веруваат дека е и во целиот свет. Широка е само 61 сантиметар во најтесниот дел, а 4,2 метри во најширокиот.
Се наоѓа во близина на стариот светилник во населбата Манара, а изградена е во 1954 година и тоа од инает.
Имено, двајца браќа се скарале за земјата што ја наследиле од нивниот татко - едниот брат добил минијатурно парче земја со чудни димензии на кое не можело да се изгради ништо, а другиот добил атрактивен дел со поглед на Медитеранот.
За инает, првиот брат изградил тенка зграда висока 14 метри, која го блокира погледот кон Средоземното Море, и со тоа ја намалил вредноста на земјата на вториот брат.
Иако изгледа како ѕид со тераса, „Al Ba’sa“ наводно има по два стана на секој кат. Во еден од становите со години бил сместен бордел за време на Граѓанската војна во земјата, а во другите биле сместени бегалци од истата.
Денес зградата стои како потсетник на една дамнешна расправија, и веројатно ќе стои уште долго; сегашните закони за градски зони во Либан наведуваат дека парцелата на која се наоѓа зградата е премногу мала за да се гради нешто. Ако „Al Ba’sa“ се сруши, ништо друго не може да се изгради на нејзино место, што значи дека земјиштето е попрофитабилно со неа отколку без неа. Како што истакна архитектката Сандра Ришани во нејзиниот есеј за зградата, „Al Ba’sa“ „продолжува да постои до инает и исто така пркосно на една од најпознатите локации во Бејрут, само времето ќе покаже што ќе биде со неа“.
