Можеби елиминацијата на Наполи и Лацио во осминафиналето на Лигата на шампионите од Барселона и Баерн воопшто не е добра за италијанскиот фудбал, но дефинитивно е за Јувентус.
Имено, откако споменатите два клуба од Калчото сезонава го завршија учеството во елитното европско натпреварување, останаа без можност да освојат дополнителни бодови кои би ги однеле на Светското клупско првенство, што значи дека од Чизмата на ова натпревар ќе оди клубот од Торино.
Да биде уште поинтересно, Јувентус е единствениот тим кој успеа да обезбеди пласман во САД без да учествува во Лигата на шампионите сезонава.
„Старата дама“ стана десеттиот клуб од Европа кој успеа да се пласира во ова натпреварување, а досега тоа го направија Челси, Реал Мадрид, Манчестер Сити, Баерн, ПСЖ, Интер, Порто, Бенфика и Борусија Дортмунд.
Европа ќе обезбеди уште два претставника за ова натпреварување, а тоа ќе бидат Атлетико или Барселона, односно Салцбург или ПСВ.
Покрај екипите од Европа, учество на Мундијалот обезбедија и Оукленд Сити од Нов Зеланд, Палмејрас, Флуминенсе и Фламенгу од Бразил, мексиканските Леон и Монтереј, Ал Ахли од Египет, Видад Казаблканка од Мароко, јапонската Урава Ред Дајмондс, Сиетл Саундерс од САД и Ал Хилал од Саудиска Арабија. Така, од 32 екипи познати се 21, а останува уште да се добијат 2 од Азија, 2 од Африка, 1 од Северна Америка, 3 од Јужна Америка, 2 од Европа, како и домаќинот од САД.
Клупското светско првенство ќе се одржи од 15 јуни до 13 јули следната година.